Hasi egin da AAB-Askatasunaren aurkako epaiketa
Erakunde politiko eta sozialen aurkako joerari jarraituz, Jarrai-Haika-Segi gazte erakundeen auzipetzea eta 18/98 sumario ezaguna eta gero, apirilaren 21ean Amnistiaren aldeko mugimenduan diharduten euskal herritarren aurkako ahozko epaiketaren lehen sesioa ospatu zen, erakunde armatuko kide izatearen akusazio pean
EAD/AED-k Entzutegi Nazionalaren indargabetzea galdatzen du
iEAD-Europako Abokatu Demokraten elkartearen idazkaritzak, joan den apirilaren 19an ospatutako bileran, deklarazio bat burutu zuten, Espainiako Entzutegi Nazionalaren iharduerak eragiten zien ardura adieraziz, honen azken urteotako ibilbidea ikusirik eta, bereziki, Amnistiaren Aldeko Mugimenduaren epaiketaren testuinguruan.

Biziarteko zigorra: espainiar Poliziak Fernando Etxegarai berriro atxilotzen du
Fernando Etxegarai plentziarra 1987an izan zen atxilotua eta urte honen hasieran askatasuna berreskuratu zuen, espetxean 21 urte eman eta gero. Urtarrilaren 4an, Etxegarairen bikotekoak Habeas Corpus-aren premiazko aplikazioa eskatu zuen eta bere abokatuek libre utz zezatela galdatu zioten Entzutegi Nazionalari, zigorra beterik edukitzeagatik

IRITZIA:
Justiziaren ziztrinkeriak
Julen Arzuaga, Euskal Herriko Giza Eskubideeen Behatokia
Alderdi politikoen legea. Ondorioak:
Zentsura-mozioaren porrota eta gero, Garzon-ek Arrasateko Alkatesa espetxeratzen du
Burrunba politikoa dago Arrasateko Udaletxean ETA-k, hauteskunde kanpainiaren erdian, Isaias Carrasko PSOE-ko kidearen aurka atentatua burutu zuenetik. Aste batzuk beranduago, PSOE-k eta EAJ-k mozioa aurkezten zuten, Ino Galparsoro EAE-ren Alkatesaren dimisioa galdatuz

Ertzantzak EAE eta EHAKren ilegalizazioaren aurkako manifestaldi baketsua galarazi egiten du
Otsailaren 8an, Baltasar Garzon Entzutegi Nazionaleko Epaileak EAE eta EHAKren ihardueraren etetea agindu zuen, Batasunak alderdion “kontrola hartu” zuela argudiatuz eta martxoaren 9an ospatu beharreko hauteskundeetan parte har zezatela debekatzeko asmo nabariarekin

Entzutegi Nazionalak EAEren egoitza bat ixten du
Espainiako Polizia Nazionalaren agenteek Portugaleteko EAEren egoitza miatu eta itxi egin zuten joan den maiatzaren 5ean

TORTURA:
Torturaren itzala: hamar gazte atxiloturik Gipuzkoan
Espainiako Poliziak Oarsoaldeako hamar gazte atxilotu zituen joan den ostiralean, maiatzaren 18, legeria antiterroristaren aplikazioan jasotako “kale borroka” burutu izanaren akusazio pean..
:: Hasi egin da AAB-Askatasunaren aurkako epaiketa
Erakunde politiko eta sozialen aurkako joerari jarraituz, Jarrai-Haika-Segi gazte erakundeen auzipetzea eta 18/98 sumario ezaguna eta gero, apirilaren 21ean Amnistiaren aldeko mugimenduan diharduten euskal herritarren aurkako ahozko epaiketaren lehen sesioa ospatu zen, erakunde armatuko kide izatearen akusazio pean. Bata bestearen atzetik, Estatuaren errepresioa salatu eta biolentzia horren biktimenganako elkartasuna jorratzen duen erakundeko 27 kidek, beraien jardueraren zioak azaldu zituzten, bai eta berau ze esparrutan burutzen den ere: prentsaurrekoak, mobilizazio baketsuak, sakabanaketa politikak presoei eta hauen senitartekoei eragindako gastuei aurre egiteko diru-bilketak, bestelako eragile politiko eta sozialekin batera eginiko elkarlana, euskal herritarrei arreta judiziala ematea... Auzipetuok, honenbestean, preso politikoen sakabanaketa eta honek beraien senitartekoengan duen eragina, espetxeetako bizi-baldintza ankerrak, tortura, Euskal Herriak bizi duen militarizazioa, gerra zikina, poliziaren biolentzia, eta abar salatzeko parte hartu izandako dinamikei buruz hitz egin zuten.

Auzipetuok, gainera, mugimendu horretan parte hartzera bultzatu zituzten motibazio pertsonalak ere azaldu zituzten: errepresioa norberarengan pairatu izana, senitarteko errepresaliaturen bat edukitzea, aparteko larritasuna izan duten ekintza errepresiboek eragindako kontzientziazioa...

Ostean, banan-banan, eta antzeko prozesuetan gertatu bezalaxe, “epaia jada idatzirik dagoen ustea azaleratu zuten, “epaiketa aurretiaz erabakitako zigor baten antzezpen soila besterik ez” dela, edota “iruzur bat, besterik gabe. Honengatik guztiarengatik, eta lehenagoko epaiketak nolakoak izan diren ikusirik, behar bezalako prozesua burutzeko berme judizialen falta antzemanez berriro ere, auzipetuek defentsa juridikoa egikaritzeari uko egin zioten. Auzipetu guztiek sinatu eta komunikabideei luzatutako testu batean, zera agertzen zuten: ez daudela prest “dagozkigun eskubide zibil eta politikoen defentsa egiten, eskubide horiek ez direlako ez negoziagarriak ez fiskalizagarriak. Ez diogu salbuespeneko auzitegi honi halakorik egiteko legitimotasunik aurrezagutzen”.

Defentsako abokatuek, era berean, proposatutako 250 lekukoen agerpena ukatu egingo zutela jakinarazi zioten epaimahaiari; Estatuko biolentziaren biktimak eta hauen senitartekoak diren 12 besterik deituko ez zituztela.

Deklarazioak eta gero, Teresa Palacios epaimahaiburua mintzatu zen, epaiketaren izaera politiko eta epaimahaiaren partzialtasunari buruzko salaketei erantzuteko asmoz: “ez da Entzutegi Nazionala orain auzipetzen ari garena. Ez ditugu pentsaerak epaitzen, delituzko jarduerak baizik”. Jarraiango egunetan, ordea, eta akusazioak aurkeztutako lekukoen bidez, delituzko jarduerarik egon ez dela frogatzen da, akusazio konkretu eta tasaturik ez dagoela ikusten da, auzipetuei banakako modu batean egotz dakiekeen jarduera deliktiborik ez da ageri.

Dena da zehaztugabea, dena dago lauso. Terrorismo delituaren interpretazio hedakor eta gehiegizkoaren aurrean gaude berriro ere, Auzitegi honek ohiko duen bezala.

hasierara joan

:: EAD/AED-k Entzutegi Nazionalaren indargabetzea galdatzen du

EEAD-Europako Abokatu Demokraten elkartearen idazkaritzak, joan den apirilaren 19an ospatutako bileran, deklarazio bat burutu zuten, Espainiako Entzutegi Nazionalaren iharduerak eragiten zien ardura adieraziz, honen azken urteotako ibilbidea ikusirik eta, bereziki, Amnistiaren Aldeko Mugimenduaren epaiketaren testuinguruan.

Horrela, Gilberto Pagani elkarteburuak, Bizkaiko Abokatuen Bazkundean ospatutako agerraldi publikoan eta Eskubideak euskal abokatuen elkarteko hogeita hamarna kidez lagundurik, Entzutegi Nazionalaren jarduera salatu zuen. Italiar juristak azpimarratu zuenez, EAD-k “sarritan adierazi izan du Entzutegi Nazionalean burututako prozedurei buruzko ardura, 18/98 sumarioaren kasuan, besteak beste, Zuzenbidearen Printzipio Orokorrak zein atxilotu eta auzipetuaren oinarrizko berme eta eskubideak edukinik gabe uzten dituzten aparteko legeria batzuen aplikazioa” dela-eta.

Europar abokatuen elkarteak gogora ekartzen du Amnistiaren Aurkako Mugimenduko epaiketan auzipetutako 27 lagunen artean Julen Arzuaga abokatua dagoela, eta sumarioaren instrukzioan emandako “defentsarako eskubidea eta sekretu profesionalaren bortxaketa” salatzen ditu. Zentzu honetan, legez kontrako iharduera batzuk zerrendatu zituen, hala-nola: “sekretu profesionalari eta bezeroenganako komunikazioen konfidentzialtasunari zor zaizkien bermeak bete gabe burutu diren abokatuen despatxoen miaketak, prozesuaren bidegabeko luzapena, zuhurtziazko neurrien gehiegikeria (prebentziozko espetxeratzea lau urte arte luzatzea eta “elkarteon ihardueraren etete judiziala”, Amnistiaren Aldeko Batzorde eta Askatasunari men eginez)”.

Egoera honen aurrean, “Entzutegi Nazionala bezalako aparteko auzitegien indargabetzea” galdatu zuen.

EAD-k onartutako mozioa

EAD-Europako Abokatu Demokraten elkarteak, giza-eskubideen bortxaketen salaketa publiko eta espetxeratutako pertsonenganako alkartasunaren alorrean diharduten Amnistiaren Aldeko Batzordeak eta Askatasuna erakundeen aurkako 33/01 sumarioaren ahozko epaiketari hasiera eman zaion berri izan du. Prozedura honetan 27 auzipetu dago, horien artean Julen Arzuaga abokatua, gure elkartean Eskubideak-en ordezkari dena.

EAD-k, azken urteotan, sarritan agertu izan du Entzutegi Nazionalean burutzen diren prozedurek eragiten dioten kezka, horien artean 18/98 sumarioa, non aparteko zenbait legeriaren aplikazioaren ondorioz, Zuzenbidearen Printzipio Orokorrak eta atxilotu zein auzipetuaren oinarrizko berme eta eskubideak eduki gabe geratzen baitira.

Tipo terroristen interpretazio hedagarriak eta aparteko legeria honen aplikazioak, oinarrizko eskubideen bortxaketa dakarte, defentsarako eskubidea eta errugabetasun presuntzioarena, esaterako.

Testuinguru honetan, gure kezka azaldu behar dugu sumarioaren instrukzioa nola burutu den ikusi eta gero. Adibidez: sekretu profesionalari eta bezeroenganako komunikazioen konfidentzialtasunari zor zaizkien bermeak bete gabe burutu diren abokatuen despatxoen miaketak, prozesuaren bidegabeko luzapena eta zuhurtziazko neurrien gehiegikeria, prebentziozko espetxeratzea lau urte arte luzatzea eta elkarteon ihardueraren etete judiziala kasu. Honengatik guztiarengatik, zera adierazi nahi dugu:

- Defentsarako eskubidea eta sekretu profesionalerako eskubidearen bortxaketa salatu nahi ditugu.
- Entzutegi Nazionala bezalako aparteko auzitegien indargabetzea galdatzen dugu.
- Terrorismo kontzeptuaren hedapen arbitrario eta onartezina gaitzesten dugu, adierazpen askatasuna eta jarduera politiko sozial eta askearen babes pean burututako iharduera publiko eta demokratikoak ere bere baitan sartzera ailegatu dena.

EAD-k gertutik egingo du 33/01 prozesuaren jarraipena eta, beharrezko bada, dagozkien berme judizialen eta defentsarako eskubidearen balizko bortxaketak salatu eta publiko egingo ditu.

Europako Abokatu Demokraten elkartea

Amsterdam, 2008ko apirilaren 19


hasierara joan

:: Biziarteko zigorra: espainiar Poliziak Fernando Etxegarai berriro atxilotzen du

Fernando Etxegarai plentziarra 1987an izan zen atxilotua eta urte honen hasieran askatasuna berreskuratu zuen, espetxean 21 urte eman eta gero. Urtarrilaren 4an, Etxegarairen bikotekoak Habeas Corpus-aren premiazko aplikazioa eskatu zuen eta bere abokatuek libre utz zezatela galdatu zioten Entzutegi Nazionalari, zigorra beterik edukitzeagatik. Egun horretan bertan, Entzutegi Nazionaleko Penal Aretoko Lehen Sekzioak autoa ematen zuen Etxegarairen “askatasuna adostuz, ezarritako zigorra bete izanagatik”.

Hilabete bi beranduago, Areto berak beste epai bat eman zuen Etxegarairen “atxiloketa eta espetxeratzea” aginduz, aurreko epaian jasotako irizpideak zuzenduz eta zigorraren ahalik eta zati gehiena bete behar dela ezarriz, hots, 25 urtetako espetxea. Honen bitartez, Etxegaraik ikasketa, taller, portaera ona eta abarrengatik pilatutako luditzeen aplikazioa ukatu egiten zioten, bera epaitua izan zeneko 1995eko Kode Penalean aitortutakoak. Pilatutako luditzeen balioa ukatzen duen interpretazioa da, hain zuzen ere, “Parot Doktrina” bezala ezagutzen duguna: 1995. urtea baino lehen zigortuak izan ziren presoei, orduko legeria aplikatuz, dagozkien luditzeen balioa atzeraeraginkortasunez ukatzea.

Irizpide-aldaketa oinarritzeko, presoaren askatasuna adostu zuten epaileak “oporretarako txanda-auzitegia” osatzen zutenak izan zirela esan zuten. Zio honek ez dauka inolako balio prozesalik, logika zentzugabe horren arabera ordezkoek oporraldietan hartutako erabaki bat ere ez litzatekeelako “irmoa” izango. Gertatutakoa, erabaki irmo bat “extra iuris” zuzentzeko ahalegina besterik ez da, helegiteko epeak agortuta egonik eta, euskal preso baten aldekoa izanagatik, Estatua onartzeko prest ez dagoen erabaki irmo bat aldatzeko ahalegina, hain zuzen ere.

Etxegarairen kasuak ez dauka aurrekaririk: “Parot Doktrina” hogeita hamarna presori aplikatu egin bazaie ere, aske geratzea ukatuz, lehen aldia da Entzutegi Nazionalak aske dagoen pertsona bati zigorra bere osotasunean betetzea agintzen diona, behin zigorra beterik zuela aitortu eta gero.

Entzutegi Nazionalak atxilotzeko agindua eman eta gero, maiatzaren 6an Polizia Nazionalak Etxegarai atxilotu zuen Plentziako bere etxean, zigorraren beste 4 urte bete zitzan, guztira 25 bete arte. Elkarrizketa publikoan, Etxegaraik berriro ere espetxera sartzearen “beldur” zela adierazi zuen, eta ez zekiela ia beste 4 urtez preso egoteko gai izango zen. “Heriotz zigorra aplikatu nahi digute”, amaitzen zuen.

hasierara joan

:: Alderdi politikoen legearen ondorioak::
Zentsura-mozioaren porrota eta gero, Garzon-ek Arrasateko Alkatesa espetxeratzen du

Burrunba politikoa dago Arrasateko Udaletxean ETA-k, hauteskunde kanpainiaren erdian, Isaias Carrasko PSOE-ko kidearen aurka atentatua burutu zuenetik. Aste batzuk beranduago, PSOE-k eta EAJ-k mozioa aurkezten zuten, Ino Galparsoro EAE-ren Alkatesaren dimisioa galdatuz; dimititu ezean beste zentsura-mozio bat aurkeztuko zuten Udaletxea beste indar politiko baten esku –PSOE- gera zedin, hauteslegoak bere botoekin adierazitakoari muzin eginez. Lehen mozioak, alabaina, ez zuen aurrera egin EAE, EB-Zutik eta Aralarreko zinegotzien kontrako botoengatik: hauteskundeen emaitzak aldatzea ez zitzaien egokia iruditu, eta honek ekaitza politikoa eztandarazi zuen Espainiako Estatuan. EAE-ren aurkako mozioak Arrasaten porrot egin eta sei egun beranduago, salbuespeneko auzitegiko Baltasar Garzon Epaileak Alkatesa bertatik kentzeko lanari gogor ekin zion, zuzenean espetxera bidaliz; Fiskaltzaren bultzadarekin eta “talde terrorista lagundu izana” eta “EAE-ren ihardueren etetearen urraketa” egotziz, Garzon-ek herriaren borondatea ordezkatzen du, legea aldrebestuz.

Ino Galparsororen abokatu den Iñigo Iruin haserre agertu zen erabaki honen aurrean, eta halako erabaki batek “EAE-ren hautetsiei bide penala irekitzen” diela adierazi zuen. Akusazioa burutzen ari zirenean erakutsitako inprobisazioaz gain (Arrasateko Alkatesa jada espetxean zegoela egin zituzten miaketa eta ikuskapenak), abokatuak zera salatu zuen: Garzon-ek berak, EAE-ren ihardueren etetea ezartzen zuen otsailaren 8ko autoan, hala ziharduten hautetsien iharduerak ezin zitzaizkiela etendako alderdiari egotzi zioela. Orain, ordea, iritziz aldatu egiten du: Alkatesaren espetxeratzea oinarritzeko “Alkatesaren banakako iharduerak eta EAE-ren ordezkari bezala burututakoak” ezberdintzen ditu eta “etenda dagoen alderdi baten ordezkari bezala ezin ihardun” dezakeela berresten du, Alkatesaren “borondate menderagaitza” aipatuz.

Ino Galparsoro Arrasateko Alkatesa Soto del Realen dago, bere sorterritik 400 km-tara. Arrasatek bere osotasunean greba orokorra egin eta herriaren protesta espetxeko harresietaraino eraman zuten, herria zigorrarekin bat ez datorrela adieraziz.

hasierara joan

:: Ertzantzak EAE eta EHAKren ilegalizazioaren aurkako manifestaldi baketsua galarazi egiten du

Otsailaren 8an, Baltasar Garzon Entzutegi Nazionaleko Epaileak EAE eta EHAKren ihardueraren etetea agindu zuen, Batasunak alderdion “kontrola hartu” zuela argudiatuz eta martxoaren 9an ospatu beharreko hauteskundeetan parte har zezatela debekatzeko asmo nabariarekin. Halako gehiegikeriaren aurrean, hautetsi independentistek manifestaldira deitu zuten, “Euskal Herriaren eskubideen alde, salbuespen-egoerari stop” lelo pean Bilbon ospatu beharrekoa.

Garzon Epaileak autoa eman zuen aurreko egunean deialdia baliogabetuz, “EHAK eta EAEren deialdi bateratua” zelakoan eta hauen iharduera etenda baitzegoen.

Debekuaren gainetik, ordea, deialdia egin zuten hautetsi independentistek, norbanako moduan eta norberak bere eskubide politikoak egikarituz, manifestaldia mantentzea erabakitzen zuten.

Horrela, Eusko Jaurlaritzako Barne Sailak berehala bete zuen salbuespeneko Entzutegiak emandako debeku agindua, itzelezko polizia-lerroa ezarriz eta manifestaldi baketsurako eskubidea erabat murriztuaz. Ertzantzaren istiluen aurkako brigadak hainbat karga bortitz egin zituen manifestarien aurka; hainbat zauritu egon ziren, Bilboko erietxeetara eraman zituztenak.

hasierara joan

:: Entzutegi Nazionalak EAEren egoitza bat ixten du

Espainiako Polizia Nazionalaren agenteek Portugaleteko EAEren egoitza miatu eta itxi egin zuten joan den maiatzaren 5ean. Hiru ordutako miaketa eta gero, agenteek EAEren bandera kendu eta materialez betetako bost kutxa eraman zituzten, artean “presoei buruzko propaganda, panfleto politikoak, taberna pintatzeko erabilitako pintura boteak, EAEren paper zaharrak eta AHTri buruzko iragandako hitzaldi baten kartel zahar bat ere bai”, egoitzako arduradunak komunikabideei adierazi bezala.

hasierara joan

:: Torturaren itzala: hamar gazte atxiloturik Gipuzkoan

Espainiako Poliziak Oarsoaldeako hamar gazte atxilotu zituen joan den ostiralean, maiatzaren 18, legeria antiterroristaren aplikazioan jasotako “kale borroka” burutu izanaren akusazio pean.

20 urteko Josu Arruabarrena gazteak sabeleko mina izan zuen hasiera-hasieratik eta, ondorioz, Donostia Ospitalera eraman zuten, bertan gastroenteritis akutua diagnostikatu ziotelarik. Tratamenduan jarri eta dieta berezia zein mediku-ikuskapena errezetatu zizkioten eta, jarraian, ziegara eramana izan zen berriro ere.

Gainontzekoen izen-abizenak gerora konfirmatuak izan ziren. Espainiako Poliziak beraien etxebizitzak miatu zituen, ezer berezirik aurkitu ez zutelarik ohiko ditugunetaz aparte: ordenagailuak, agendak, pegatinak, kartelak, DVD-ak...

Grande-Marlaska Epailea ibili zen operazioa zuzentzen. Gazteon abokatuek, inkomunikazioaldian torturak ekiditeko protokoloaren aplikazioa galdatu zioten, hots, galdaketak bideoz grabatuak izan zitezela, atxilotuaren konfiantzazko medikuaren partehartzea eta familiari atxilotuaren kokapen eta egoerari buruzko informazioa ematea. Entzutegi Nazionaleko Magistratuak, ordea, sistema hau abian jartzea ukatu egin zuen.

Horrela, bada, bost eguneko inkomunikazioaldia eta gero, gazteak Epailearen aurrera eramanak izan ziren eta honek, gazteotako bost espetxeratuak izan zitezela agindu zuen. Aitor Alberdik, Madrilgo Valdemorora eraman zutena, zera jakinarazi zien bere senitartekoei: jasandako etengabeko tortura psikologikoen ondorioz eta Poliziak esandako moduan deklaratzera behartua izan ostean, haginkadaka bere eskumuturreko zainak mozten saiatu zen Entzutegi Nazionaleko ziegetan. Senideen arabera, gazteak “porrot egin zuen” aipatu tortura psikologikoen eraginez eta neskalaguna atxilotuko zuten mehatxuaren berri izan ostean, kalabozoetako klaustrofobiarekin batera. Alberdi ospitaleratu eta ebakuntza egin behar izan zioten bere buruari eragindako lesioak sendatzeko.

Oarsoaldean atxilotutako gazte guztiek poliziaren egoitzetan tratu txarrak jasan izana salatu zuten. Aske geratu ziren bostek salatu zituzten, komunikabideen aurrean, pairatutako “mehatxuak, oihuak, kolpeak, umiliazioak”. Haizea Iriarte gazteak “gurekin nahi izan dutena egin” dutela esan zuen, “imajina ere ezin genezakeen bezala tratatuak izan gara, inorrentzat nahi ez duguna bizi izan dugu”.

Aiert Larrarte TAT-Torturaren Aurkako Taldea-ren abokatuak, torturengatiko salaketaren ardura duen Donostiako Epaileak “gazteei deklarazioa hartu ere” ez zuela nahi izan salatu zuen. Era berean, gazteek, unean bertan auzi-mediku batek aztertuak izateko eskaria ere ukatu egin zuen. Honen ondorioz ezinezko bilakatzen da, oraingoz, Alex Etxeberria gazteak buruan dituen kolpe-marken jatorria zein den ezartzea; edota Gorka Etxeberria gazteak inkomunikazioaldian 9 kilo galdu izanaren zergatia.

hasierara joan

:: IRITZIA:
Justiziaren ziztrinkeriak.
Julen Arzuaga, Euskal Herriko Giza Eskubideen Behatokia

Diotenez, prozesu penalaren zereginaren oinarrian dago gizartearen seme-alaba kuttunen birgaitze eta berreskuraketa. Baina printzipio hau desagertu egiten denean –auzipetuek, izan ere, ez baitziotelako inoiz gizartearen parte izateari utzi, edota berez deliturik ez dagoelako eta gizartea kaltetu ez dutelako, beraien eskubideak egikaritza soila burutu baizik-, auzitegia, beraren menpe dagoen hiritarra “etsai” bezala tratatzen ari da. Desagertu egiten dira bermeak, Zuzenbidearen Printzipioak eta Zuzenbidea erregulatzen duten arauak ere bai. Honek guztiak eragina dauka prozesu judizialean eta, justizia bilatu baino, mendeku politikoaren helburuarekin funtzionatzen duen erakundearen ondorioak aplikatzen zaizkio auzipetuari.

Akusatuak, “etsaiak”, bere hautua egin behar du, egoera honen aurrean bere jarrera agerrarazteko erantzukizuna du. Arauak onartuz gero, prozesua burutu egingo da, akusatu eta epailearen arteko elkarrizketa eratuko da: akusatuak azalpenak emango dizkio errespetatu beharreko balioak ezarriko dituen epaileari. Akusatuak arauak onartu ezean, berriz, aparatu judiziala desegin egingo da, epailearen balioak eta bere sistema kolokan jarriak izango dira eta, honenbestean, haustura etorriko da: rol-ak aldatuko dira eta, orain, Estatua izango da Justiziari, letra nagusiz, azalpenak eman behar izango dizkiona.

Hau da Espainiako Estatuak beraien iharduera politiko, sozial edota kulturalarengatik prozesuotan auzipetutako euskal herritarrei ezartzen dien salbuespeneko justizia. Arreta handiz jarraitu ditugu Jarrai-Haika-Segi eta aski ezaguna den 18/98 prozesuen nondik-norakoak, defentsak burututako lan miresgarria ikusiz, urriak eta auzitegiak urratutako lan-tresnak erabiliz auzipetuen eta beraien iharduera publiko eta gardenaren defentsa ezin hobea burutu dutelarik. 18/98 auziko epaiak, hala ere, defentsak zuzendutako ehundaka gai eta arazoetako batean ere ez zion arrazoirik ezagutzen: defentsak aurkeztutako testigantzak, frogak, txostenak... kolpean ezereztuak denak.

Halakoak ikusirik, giza-eskubideen alorrean diharduten talde ugariren erantzuna etorri da, baita juristena eta bertako nahiz nazioarteko erakundeena ere, Entzutegi Nazionalaren erabateko independentzia-eza salatu eta bere itxiera galdatu dute, egikaritzen duen salbuespeneko legeriaren indargabetzearekin batera. Ikusi ahal izan dugu ere bai, eta ezin ahaz dezakegu, akusatuen jarrera zein izan den, beraien jarduera politiko eta soziala defendatuz, auzitegiaren independentzia-eza, partzialtasuna eta gehiegikeriak salatuz eta, batez ere, itzelezko osotasun eta duintasun lezioa emanez, hemendik biziki azpimarratu nahi dudana. Guzti hau euskal gizartearen memorian grabaturik geratu da.

Aurrekariak hauek izanik, AAB-Askatasuna kasuko auzipetuok urrats bat gehiago eman nahi izan genuen gure jardueraren auzipetzearen aurrean, errepresioaren salaketa, berau pairatzen dutenenganako elkartasuna eta euskal gatazkaren konponketarako tresnak jartzea etengabe eskatzen dituen jarduera izaki. Gure koherentziatik abiatuz, eta auzitegi honen izaera anti-demokratikoa salatzearren, prozesuan zehar edozein motatako defentsa egikaritzeari uko egiten diogu.

Desobedientzia proposatzen dugu, edukien haustura, auzitegiak berezko dituen balioen suntsiketa. Forma juridikoekiko gure oposaketa pasibo eta eduki politikoekiko jarrera aktiboaren bitartez, errepresioaren salaketa barik, delitua errepresioa bera dela islatu nahi izan genuen.

Eta beraz, zigortu bai, baina ezin epaituko gaituen horren aurreko gure jarrera ez da ordena zaharkitum justizia ziztrin baten aurkako kritika soila. Eskenatoki politiko berri baten aldarri ozena ere bada, etorkizunari begira esperantzaz, indarrez, aldaketa bat egon behar duela iragarriz. Demokraziaren berrezarketa, norbanakoaren eta kolektiboaren oinarrizko eskubideen aintzatespena eta milaka euskal errepresaliatuen aintzatespena eta medeaketa dakartzan aldaketa.


hasierara joan